Euskal diaspora Interneten

Diasporak bere buruaz idatzi zuena gordetzeko ere balio izan du Internetek. Bi proiektuk egiten dute gaur artxibo lana: bata instituzionala, prentsaren mende bat digitalizatu duena, eta bestea pertsonala, ikasle batek 1994an zabaldu eta oraindik zabalik dagoen webgunea.

Urazandi Digital Eusko Jaurlaritzaren proiektua da diasporako prentsa biltzeko. 2003an hasi zen, eta gaur 183 argitalpen eta ia 200.000 orrialde eskaintzen ditu, hiru kontinenteko 17 herrialdetan mende batean zehar argitaratuak. Euskal etxeetako aldizkariak daude, baina baita enpresenak, ikastetxeenak, alderdienak eta Eusko Jaurlaritzaren ordezkaritzenak ere. Argentina da titulu gehien ematen dituen herrialdea (38), eta atzetik datoz Frantzia (37), Venezuela (29) eta Mexiko (23). Materialak Creative Commons lizentziarekin argitaratzen dira, besterik adierazi ezean.¹⁹

Buber’s Basque Page-k 25 urte bete zituen 2020an, eta bizirik dago oraindik. Webguneak berak dioenez, mila orrialde inguru ditu eta egunean 16.000 bisita baino gehiago. NABO federazioak 1998an aitortu zuen, eta 2006an euskal webgune onenentzako sariak jaso zituen, haren izena daramatenak: Buber Sariak. Atal guztien artean, gehien kontsultatu dena euskal abizenena izan da, Xabier Ormaetxearen lana.⁴